Колледж ұстаздары мен студенттері Мемлекет басшысының ел болашағына бағытталған маңызды бастамаларын терең ықыласпен тыңдап, оның ішінде білім беру саласына қатысты айтылған ой-пікірлерге айрықша назар аударды. Президентіміз атап өткендей, еліміздегі техникалық және кәсіптік білім беру ұйымдары заман талабына сай жаңарып, еңбек нарығының сұранысына бейімделуі тиіс. Бұл — жастардың болашақта қоғамға пайдалы, елге қызмет ете алатын тұлға болып қалыптасуына жол ашады.
«Сарыағаш Медресе колледжі» ретінде біз тек діни білім берумен ғана шектелмей, студенттерге заман талабына сай зайырлы білімдер мен жаңа технологияларды да меңгертуге тырысып келеміз. Президент Жолдауындағы басты бағыттардың бірі — цифрландыру мен жасанды интеллектті дамыту. Бұл — бүгінгі қоғамның даму жолындағы аса маңызды қадам. Білім мен технологияны ұштастыра отырып, дін мен дәстүрді сақтау — біздің басты мақсаттарымыздың бірі.
Сондай-ақ, Мемлекет басшысы көтерген өзекті мәселелердің бірі — студенттерді жатақханамен қамтамасыз ету. Бұл бағытта мемлекеттік-жекеменшік серіктестікті дамыту қажеттігі айтылды. Президенттің айтуынша, барлық жауапкершілікті мемлекетке жүктей беруге болмайды. Сондықтан, жеке меншік оқу орындары өз базасын нығайтып, жатақхана сияқты инфрақұрылымдарды өз қаражаты есебінен де дамытуға ынталы болуы тиіс.
Сарыағаш Медресе колледжі Жолдауда көрсетілген міндеттерді толық қолдай отырып, ел болашағына қызмет ететін білімді ұрпақ тәрбиелеуге күш салатынын мәлімдейді. Дін мен ғылым үндесе отырып дамығанда ғана қоғамның рухани және материалдық іргетасы нығаяды.
