Бүгін, 2025-2026 оқу жылының алғашқы күнінде, колледж директоры Дінмұхаммед Абдужаппарұлының жетекшілігімен ұжымдық жиналыс өтті. Бұл – жаңа жылға дайындықтың маңызды кезеңдерінің бірі ғана емес, тұтас бір білім маусымының бағдарын айқындаған тағылымды сәт болды.
Жиын барысында колледж директоры ұлт болашағы – жастарға сапалы білім мен ата-бабамыз ұстанған, салт дәстүрімізбен ұштасқан рухани тәрбие беру жолында атқарылар ауқымды жоспарлармен таныстырды.
– «Білім – нұр, тәрбие – тағылым. Біз білім саласындағы жұмыстарымызды ата-бабамыздың салиқалы жолымен, Әбу Ханифа мәзһабы мен имам Матуруди сенімі негізінде жүргізуге тиіспіз. Өйткені, шәкірт тек пәндік біліммен емес, рухани құндылықпен де сусындауы керек», – деп атап өтті.
Жиналыс аясындағы негізгі тақырыптар:
Білім сапасын арттыру жолдары мен жаңа әдістемелер;
Шәкірттерге жан-жақты қолдау көрсету және тәрбиелік бағытты күшейту;
Ұстаздардың кәсіби дамуы мен тәжірибе алмасу;
Оқу-тәрбие жұмыстарын жаңа деңгейге көтеру стратегиялары.
Жиналыс соңында ұжымға жаңадан қосылған ұстаздар таныстырылып, жылы лебіздер айтылды. Бұл жаңа есімдер – біздің ұжым үшін үлкен қуаныш. Олардың кәсібилігі мен жаңашыл көзқарасы – шәкірттеріміздің болашағына бағыт болары сөзсіз.
Сарыағаш медресе колледжі жаңа оқу жылына жаңа мақсаттармен, нық сеніммен қадам басты.
Біздің басты міндетіміз – елдің ертеңі болатын жас ұрпақтың жүрегіне имандылықтың нұрын, бойына білімнің күшін, санасына парасаттың дәнін себу.
Ұжымдық бірлік – табыстың тірегі. Бірлігі жарасқан, рухы биік ұстаздар қауымы – кез келген қиындықты еңсеріп, үлкен нәтижелерге қол жеткізе алатын қуатты күш.